رد فعل

شفيق لازم يرحل --- شفيق لازم يبقى

المشكلة ان نفس الناس اللى قالت كفايه للثورة بعد التنازلات اللى قدمها مبارك قبل التخلى واعتراضهم على استمرار الثورة والراجل عمل اللى عليه والكلام ده , هى نفس الناس اللى بتنادى النهارده باستمرار شفيق وكأنهم متعلموش الدرس , وان شفيق وغيره كتيير من النظام السابق لن يتم الكشف عن بلاويهم ومصايبهم الا بعد اقالة شفيق وحكومته وهذا ما كشفت عنه الايام التاليه لتخلى مبارك عن الحكم .. كمان لازم نعرف ان الحكومه دى كانت حكومة انقاذ النظام السابق والقضاء على الثورة واحلام المصريين بالحريه والكرامه فمش ممكن يبقوا هما اللى النهارده هيحققوا اهداف الثورة واحلامنا وطموحاتنا وهم نفسه الذين عكفوا على انتهاك احلامنا عشرات السنيين , وكمان بقى ليها مهمه تانيه هى حماية مبارك واسرته وبعض رموز الفساد من المحاكمه , وابسط حاجه تأكد ده ان فى ناس من اللى بيتحاكموا دلوقتى بتحاكموا فى تهم اقل من التهم الاصليه اللى المفروض توجه ليهم وده معناه ان فى بعضهم هيطلع براءه بواسطة محامى شاطر

اما بخصوص شفيق بغض النظر عن الاسماء هو كرئيس للحكومه الحاليه الغير شرعيه من وجهة نظرى لا يستحق ان يكون رئيس لحكومه مصريه لاسباب واضحة بعيدا عن التشكيك فى ذمته من عدمه ,

اولا واقعة الجمل واحداث القتل والترويع التى تحدث فى مصر منذ قيام الثورة وحتى الان وقيام رئيس الحكومه بالقول انه ما يعرفش مين اللى وراء هذه الجرائم والتى ما زالت مستمره الى اليوم , ده ليه بعض المعانى : انه فعلا ما يعرفش وده فشل ذريع وكارثه ان رئيس حكومه يبقى ما يعرفش

والتانيه انه يكون بيكدب وانه عارف مين وبتستر عليه لان مصر كلها عرفت هم مين وكان بيطلع يوعد بحماية المتظاهرين وفى نفس الوقت يتم الاعتداء عليهم بالقتل والقنص والضرب , بغض النظر عن رفضه للثورة وعدم اعترافه بها وتهكمه منها

وكمان احب اكد ليكم ان الناس دى يوم ما تمشى هنلاقى وراهم بلاوى هتكشف حاجات كتيير محدش يقدر يتوقعها

خلينى كمان اطرح سؤال ليه الناس دى مكمله رغم الرفض العلن ليهم من شريحه كبيره , بغض النظر عن ان ليهم مؤيدين ؟؟؟