رد فعل

الرئيس المبدع 

بقلم: صبحي وحيد

الرئيس المبدع هكذا يطلق عليه الساسة والنخبة وكل الافاقين وأولهم رئيس مجلس الوزراء ..
على فكره انا لست معترض على المسمى واتمنى ان يكون في محله بس فين الامارات انا اللى اقدر افهمه ان كل حاجه ليها امارات وخصوصا الابداع .. 

واتمنى ان كل واحد هيقرا هذه الكلمات يقول فين الإبداع من وجهة نظره ..
بدء الرئيس بعد اسبوع تقريبا من التنصيب بالإعتذار ثم اعقبه المارثون والزيارات الخارجية كل هذا جيد ولكن لا يوجد فيه ابداع ..
الكهربا بتقطع ومعاها الميه (ماشى الحال) .. البنزين داخل على ازمه وبيقولوا سعره هيزيد  (اوك) ,, 

الأسعار في تزايد مستمر وبتسابق الزمن (باركيه)..
كل ده كوم وموضوع التبرع ده كوم تانى خالص (حماده حماده يعنى )
اولا  قال هتبرع بنص مرتبى ونص ثروتى ( هايل ) بس انا عايزه يشتغل وياخد حقه كامل علشان حسابه يكون كامل وكمان عايز اعرف ثروته دى كام وجابها منين 
( اقرار ذمه ماليه .. من اين لك هذا ) زى ما تحبوا تسموها انا مش فارق معايا انا بتكلم عن رئيس مصر عايز اعرف دخل القصر بكام وطالع منه بكام ولا هو عيب ..
كمان عايزه بدل ما يتبرع بنص مرتبه ياخد مرتبه كامل ويرشد انفاق ديوان رئاسة الجمهوريه وكذلك الوزراء والمحافظين واى مسئول في الدولة .. 

ما هو لو أنت مرتبك 42 ألف وهتتبرع ب 21 يبقى كتر خيرك لكن لو الديوان بيصرف مليون ورشد ووفر نص مليون مش يبقى احسن ..
المهم مش عايز اطول عليكم انا كنت بكره مبارك لانه كان عايش في نعيم وكتير من الشعب بينام جعان واللى نفسه حلوه شويه كان بياكل من الزباله وأى رئيس هيبقى زيه هكره أمه ويمكن اكتر من مبارك لانه متعلمش حاجة ن تجربة مبارك ..
ناس كتير هتبقى شايفه ان الكلام ده ملوش مناسبه او مش وقته او لسه بدرى على الحكم على الراجل .. 

بس الرد سهل لما ابنك و بنتك لا قدر الله تتعب (ربنا يحفظكم واولادكم من كل سوء) جرب تروح بيها مستشفى عام او خاص والله ما هتفرق كتير طالما الخدمه سيئه هنا هتكون برده سيئه هنا .. 

المهم الشاهد من الموضوع ان بنتى تعبت ( نزلة معوية ) كل مرة اخدها وأجرى على مستشفى خاص ويقرفونى وألاقى دكتور جاهل وصاحب مستشفى نصاب وفى الاخر بيبقى معايا على التليفون صديق طبيب ربنا يجزيه خير هو اللى ربنا بيجعله سبب في شفاءها دايما على التليفون كل مرة هى او اخواتها ..
المهم المره دى انا كل لما حد يتكلم على الرئيس قدامى وعن انجازاته ابقى مذبهل قولت والله لواخد البنت ورايح مستشفى اطفال حكومى واشوف الناس بتعمل ايه في ولادها ( ودى كانت مخاطره ربنا ما يكتبها على حد ) المهم روحت وخدت دورى زى اى حد ومش عايز اقولكم الوحدات البيطرية أفضل من المستشفيات الحكومية ونفس الأطباء الجهلة اللى في المستشفيات الخاصة هم نفسهم اللى في المستشفيات الحكومية. 

لكن الاسوء ان الناس في البلد دى غلابه قوى وراضيين باقل حاجه اللى هى مش موجوده اصلا .. والظل مفى البلد دى مش هينتهى ,, 

المهم خدت بنتى وطلعت على اقرب صيدلية وجيبت الأدوية اللى صديقى دايما كان بيقولنا عليها في الحالات دى والحمد لله .. 

ودى كانت تجربه واحده مع الدولة وبنستغرب الأمراض والموت كتير عندنا ليه .. 

قبل ما حد يرد يعمل زيى ومش لازم يجازف بحد من ولاده بس يروح زيارة لاى عيادة خارجية فى أى مستشفى حكومى ويعمل جولة كده انا هقولك هتعمل ايه إما انك هتبكي على حال الغلابه او هتروح وهتحس انك مش انسان ..
ويا ريت الرئيس المبدع يعمل زيارة او اتنين  ويشوف الرعية عايشة ولا مش عايشة ..
انا عايز رئيس عادل .. في حد عندكم بالاسم ده ؟؟؟؟؟؟؟؟؟؟؟؟؟؟؟؟